प्रभु बैंकका प्रमुख कार्यकारी अधिकृत (सीईओ) अशोक शेरचनसहित उच्च पदस्थ कर्मचारीलाई प्रहरीले पक्राउ गरेको छ। आज दिउँसो बिजुलीबजारस्थित बैंकको मुख्यालयमा पुगेको केन्द्रीय अनुसन्धान ब्युरो (सीआईबी) को टोलीले शेरचन, नायब प्रमुख कार्यकारी अधिकृत (डिसीईओ) मणीराम पोखरेललगायतका अधिकारीलाई नियन्त्रणमा लिएको हो।
सीआईबीका प्रवक्ता शिवकुमार श्रेष्ठका अनुसार बैंकिङ् कसुरसँग सम्बन्धित मुद्दाको अनुसन्धानका सिलसिलामा उनीहरूलाई पक्राउ गरिएको हो।
श्रेष्ठले भने, “सीईओ र डिसीईओ मात्र होइन, हाम्रो टोलीले अन्य केही व्यक्तिहरूलाई पनि नियन्त्रणमा लिएको छ। विस्तृत विवरण चाँडै सार्वजनिक गरिनेछ।”
यसैबीच, प्रभु बैंककै प्रमुख व्यवसाय अधिकृत रश्मि पन्त भने पक्राउ प्रक्रियाको जानकारी पाएपछि राजधानीबाट निस्किएर महेन्द्रनगर पुगिसकेको स्रोतले बताएको छ।
स्रोतका अनुसार उनी हिजो बेलुका घर जान्छु भनेर निस्किएकी थिइन्, तर सीआईबीको निगरानीबारे सूचना पाएपछि सीधै महेन्द्रनगरतर्फ लागेकी हुन्।
